食正《見鬼2》條水嘅PS2遊戲《九怨》，噚日新鮮熱辣出咗街，不過今個星期撞正日日落雨，個市淡靜致反應一般，遊戲本身就似《BIOHAZARD》＋《零》嘅混合版，有齊受歡迎元素，加上FromSoftware氣氛營造得唔錯，照計銷量應該不俗，可惜前排又《零：紅之蝶》又《死魂曲》，搞到機迷嚇「悶」咗，相信唔少人會等到復活節先買，而行貨市價約$350左右。至於日本大熱嘅《DQV》就真係勁得交關，日本首兩日已賣出130萬隻，香港行貨亦話咁快就斷晒貨，勇者魅力的確非凡，市價約$460左右。而上星期斷咗貨一輪嘅《塊魂》就有新貨返，市價約$310左右。
日圓滙價升極唔停，而且今個月開始免簽證去旅遊，搞到香港個Game市靜得交關，全人類嗌晒救命，而淡市就梗有死貨、冧價貨出現，今趟最值得掃平貨有「Hit過吓」嘅《戰國無雙》行貨限定版，由折算港幣過千蚊，跌到家陣四百多啲，真係普通價錢，限定級享受。