自新一代寶馬5系推出以來，經已有唔少車迷期待走高性能路線嘅M5版本出現，雖然廠方至今仍未公布新M5嘅確實推出日期，卻響今屆瑞士日內瓦車展上，展出全新ConceptM5，實行慰藉車迷嘅思念。在場展出全新寶馬ConceptM5，廠方特別安排一台5.0公升V10偈作骨幹，其馬力輸出動輒高達500匹，就連扭力輸出亦可高達51.0kgm，匹配一套7前速SMG半自動波箱，起步加速反應凌厲有勁，0至100km/h加速度僅為5秒以下咋！夠快呢!?
至於外形方面，ConceptM5或多或少都會帶有原來5系房車嘅影子，但其實當你細心留意下，不難察覺廠方特別將車子嘅造型塑造得好有跑車氣息，除裝有全新頭尾泵把連整流器外，車身兩旁更新增有鯊魚鰓生風導入口以及全新跑車尾喉等等，當然唔少得重有四輪M系跑車專用嘅19吋跑車合金胎軨組合啦！不過由於廠方未有公布關於車廂嘅細節，故有待廠方公布進一步資料後方可作實。
記者：鄭達基
