周杰倫最欣賞嘅美國男歌手Usher，近期人氣好掂，佢張新大碟《Confessions》喺美國推出唔夠一個禮拜，已經賣咗超過一百一十萬張，成為○一年至今銷量最高嘅大碟，你都咪話唔勁。咁都唔止，原來佢重好鬼旺桃花，由青春期開始已經同𠵱家行內好多出名嘅黑人女歌手行埋，當中包括Brandy、Monica、同TLC嘅Chilli，最近連有未婚夫嘅Beyonce都話要搵機會親近佢。
Brandy同Monica多年前曾經唱過首格林美得獎情歌《TheBoyisMine》，原來兩位靚女喺首歌唱緊嘅爭仔經歷，係嚟自細個同Usher發展嘅三角戀。Usher最近喺訪問入面亦大方承認細個嗰陣跟Brandy同Monica已經有「關係」，不過都係細路哥嘅PuppyLove，到十三、四歲先至同Monica嚟真，反而冷落咗Brandy。
之後Usher又同TLC嘅Chilli拍拖，Chilli更加係佢最愛嘅MV女主角。傳聞佢哋嘅三年情最近因為Usher搞大女fans個肚而玩完，不過另一位紅透半邊天嘅黑人靚女Beyonce，最近公開表示好欣賞Usher，重指定佢做全新MV男主角，齊齊親密演出，都唔理得未婚夫Jay-Z會唔會呷醋，Usher認真係豔福無邊喇！