星采控股（559）噚日公布向榮盛國際（1166）購入資產後股價急跌，表面睇嚟好似單交易唔受投資者歡迎，但經紀陳話可以睇定啲，聽講有人正在密密收貨，唔排除收齊貨後會有炒作。
榮盛將向星采出售銅桿業權益及資產，作價3.2億元，由星采向榮盛以每股4仙，發行80億股新股支付，交易完成後，榮盛持有星采75.5%。新股發行價較星采停牌前報價7.2仙折讓約44.4%。
小初記得，星采原本叫精藝，本業係生產人造聖誕樹，不過舊年中國星（326）入股做咗大股東後，精藝就連名都改埋，小初原本以為有中國星睇住，隻股會有一番搞作，但勢估唔到失驚無神變相賣咗殼。交易完成後，中國星所持星采將由20%大幅攤薄至4.9%。
經紀陳話，據講中國星同一班幕後人，舊年喺星采身上花咗唔少錢，所以斷估唔會就咁沽散隻股，而係有秩序地撤退。噚日星采先升後跌，收6.1仙，跌20%，但成交不算太大。
慕容小初