百仕達為求打造深圳南山區紅樹西岸成新一代豪宅，以選美方式，喺北京、上海、成都及廣州等地，從數千名參加者中，精挑細選出二十多位俊男美女，希望培訓成十八般武藝，樣樣都得嘅置業大使。
深圳百仕達實業副總羅雷話，佢哋都係大專畢業，有啲做過模特兒。發展商設計出一系列培訓課程，好似房地產及建築等專業知識、服務專業精神、各項運動如高爾夫球及網球等，重有……藝術欣賞。
學咁多嘢，都係為咗嗰盤，因為預期買家都講求生活品味、同要求到位服務。
佢話，班大使啱啱去完新加坡旅遊管理學校，學習同客人溝通技巧。噚日嚟香港，參觀幾個豪宅樓盤，吸取香港發展商與代理推銷豪宅嘅經驗，為賣樓做好準備。參觀過嘅樓盤，包括君頤峰、擎天半島及富豪海灣。
復活節就到，最應景當然係復活蛋同復活兔啦！嘉華地產西灣河鯉景灣商場，即蘇豪東，預備咗一大籃復活蛋畀小朋友，重有造型趣致可愛嘅賓尼兔收音機㖭。但係點樣送出啲禮物呢？
原來發展商已經安排咗嬌俏可愛嘅兔女郎，陪同賓尼兔，喺現場穿梭派送。蘇豪東做得幾成功，但嘉華地產都冇鬆懈到，每逢假期都大搞活動。
荔枝角美孚新邨雖然樓齡高，勝在喺市區地鐵站附近，樓價又平，所以好受上車客同區內換樓客歡迎。
美聯高級區域經理吳志輝話，美孚第一季共有三百五十宗成交登記，係各二手屋苑之首，舊年第一季都係冠軍。
吳志輝話，美孚造價落後大市，𠵱家每呎二二五○，千呎單位都係兩百零萬。
佢估計，第二季其他區份或屋苑成交回落時，美孚都重可以保持平穩，而造價有得升㖭，約莫十個巴仙。
成交排第二位係鰂魚涌太古城，有三二九宗。舊年美孚有一七六宗登記，比第二位嘅天水圍嘉湖山莊一五九宗，多一成一，太古城只得一二四宗。
發展商喺市場周圍搵地皮買，出價重好進取。日前南區香島道五十號易主，傳媒求證下，新地承認係佢哋買入，重講埋會起幾間洋房，日後出售同出租，總投資幾多。
點知，新地噚日主動澄清，話呢項物業唔係公司買喎！而係大股東郭氏家族，準備用嚟自住，進一步資料就欠奉。
郭氏三兄弟都各有居所，今次買香島道五十號，究竟係點樣自用法，同埋會起幾多間洋房，蘭西就好有興趣想知，重有係點解會咁鍾情嗰度呢？
同區洋房業主，第日有猛人為鄰，樓價會唔會高啲呢？
蘭西
電郵地址：