政務司司長曾蔭權噚日朝早返工，回應反對釋法示威者畀警察抬走時，眉頭都皺埋。不過下晝個樣就唔同晒，開心到飛起。皆因佢應海洋公園邀請，出席大熊貓「安安」同「佳佳」定居香港五周年嘅「親親大熊貓派對」開幕禮。
海洋公園主席盛智文重送隻打煲呔嘅大熊貓公仔畀佢，加送隻細熊貓公仔，掛喺佢西裝衣領上。搞到平日一臉嚴肅嘅煲呔曾，成個樣Q晒。幾個扮熊貓嘅小朋友，行起路嚟，屁股左搖右擺嘅惹笑動作，引到曾司長笑到見牙唔見眼。盛智文見佢咁開心，中聯辦副主任李剛又喺度，致辭時臨時爆肚，請兩位高官向港京兩地嘅阿頭反映，送多兩隻熊貓畀香港，以落實一國兩制。
（圖）煲呔曾噚日同扮熊貓嘅小朋友影相，個開心樣同回應記者有關政府強行抬走示威者嘅樣唔同晒。
曾顯華攝
傳真︰2623-9278
電郵︰