人大釋法噚日展開，港股繼續淡靜，恒指升55點，收報12731，成交147億元。芬佬朋友話唔驚釋法，相信中央只想掌握特首任命，唔會對市場有太負面影響，佢重話免簽證東瀛遊熱潮影響力可能重勁過人大釋法。話時話，阿虎好多朋友最近都暫忘炒股，走晒去日本玩，因為早前個個做到冇停手，家陣重唔趁市靜去充電咩。
雖然地產代理預期樓市將進入冷靜期，不過地產股噚日繼續升，經常傳聞想配股但又配唔成嘅信置（083）勁升8.9%；而出售傳動網兼贏埋官司可獲賠成億銀嘅新世界（017）亦急升4.2%，而專靠樓市成交賺佣嘅美聯（1200）亦唔執輸，股價升8.2%。據聞美聯首季業績超晒標，向員工大派花紅，照計做佢股東都應該有着數啩。
亞洲物流（862）變身傳動網，股價大上大落，好似係東燃（432）及和記環電（757）嘅翻版，都係令到一眾股民損手。亞洲物流裂口高開報6仙，升至8仙後回軟，睇盤路似乎有唔少股民在股價回至6仙水平博反彈，但午後股價進一步回軟，結果升幅收窄至2.3%，以4.5仙收市，較全日平均成交價5.6仙低20%，成交額4528萬元，大部份在上午追入的股民都要損手。
榮盛控股（1166）亦借殼星采（559）分拆銅桿業務上市，星采復牌後同樣大上大落，先升10%至8.7仙，其後一度跌至5.1仙，跌幅高達33%，最後收報6.1仙，跌20%，幸而成交僅289萬元，對股民殺傷力始終冇亞洲物流咁勁。交易完成後，榮盛將持有星采75.5%，日後肯定要酌量減持，市場最關注係中國星（326）手上4.9%股權會何時沽出。
阿虎