楊思琦同李永豪拍拖已經係公開嘅事實，但之前楊思琦兩度上男友屋企過夜，都表現得極為鬼祟，佢試過搵男友阿媽施明做擋箭牌，有一次佢就匿喺男友嘅車廂入面扮蝦米，搞到成為笑柄，可能佢吸收咗嗰兩次嘅經驗，前晚楊思琦同男友喺銅鑼灣拍拖為雜誌影相時，佢哋就一反常態，表現大方，任影唔嬲！
前晚七點幾，着住一身便裝嘅楊思琦同成身黑衣嘅李永豪，一齊喺銅鑼灣百德新街嘅一間上樓寵物店，以情侶檔姿態為雜誌影相，不過楊思琦就十分好眼，隔住玻璃窗都望到樓下有記者。呢次佢就醒啦，喺樓上已經對記者好熱情咁揮手打招呼，就連平日好cool嘅李永豪，都一樣對記者揮手。
隔咗冇耐，楊思琦同李永豪就一人揸住一把遮落樓，楊思琦繼續對記者揮手示好，重好細心咁叫啲記者影相時要睇車，佢臨上車前，有記者再請佢影張相，佢亦即刻企定定任你影，合作程度值得一讚！
拍拖本來就係開心事，光明正大又使乜驚俾人知，所以楊思琦諗通咗嘅話，拍拖以後都happy啲啦！
之前台灣選總統，羅大佑一直表明自己係挺連宋，最近佢喺台灣中部嘅演唱會宣傳海報俾人撕爛，唔知同呢樣嘢有冇關係呢？不過就有好多歌迷打電話問佢嘅演唱會係咪取消，對於呢件事，羅大佑笑笑口咁話：「海報被破壞沒關係，不要破壞我就好。」問佢演唱會時會唔會着避彈衣上台，佢就話：「總統都不穿了，我穿幹嘛。」
梅艷芳生前經理人Marianne（王敏慧）噚日喺一個美容活動話，佢會喺九月重返校園讀法律，佢話：「我讀呢個課程阿梅都好贊成，當係完成佢嘅心願囉。」而問到關於阿梅最後一場演唱會嘅VCD，佢就話：「淨係得阿梅嘅版本呢個月會出，群星版本就傾緊版權。」
陳煒噚日喺亞視總台出席《我和殭屍有個約會III》嘅殭屍新世代選拔賽，亞視要求每個女演員都要着短裙，所以陳煒都悉心打扮，着埋DeepV上陣，佢話：「着短裙就算着打底褲，都會俾人話走光，所以我索性着件粉紅色泳衣。」不過計我馮仁昭話，如果係咁不如齋着泳衣算吧啦！
