盈科保險搵咗中國首席高爾夫球手張連偉，做環球代言人，任期三年。點解要搵張生？盈保主席袁天凡話，係按照客戶喜好，故選擇高球手做代言人；根據記者會司儀姐姐所講，今年係盈保十周年之喜，適逢係張生轉做職業球手十周年，「係個天註定佢做代言人！」
張生有幾巴閉？佢即將赴美參加第六十九屆美國名人賽，係有史以來，首位獲邀參加呢項賽事嘅中國球手。另外，佢亦係中國唯一兼備歐、亞、日、中及澳大賽全資格嘅球手，球技唔使講啦！咁盈科主席袁天凡嘅球技又如何呢？佢自己話成差不多五十歲先學，未打波之前，可以話係冇做任何運動，所以有些少成績時，佢位太座就會請朋友食鮑魚，以示支持。咁𠵱家打成點呢？佢謙稱話差不多要一百桿，但有口痕友搭嘴話八十就得，咁即係點？大家自己諗啦！
（圖）問袁天凡打高爾夫球打成點，佢謙稱話差不多要一百桿喎。
傳真︰2623-9278
電郵︰