近年歌、影、視三棲發展嘅日本女星柴崎幸，早前俾日本記者選為「最乞人憎到要一腳踢」嘅日本寸星，最近佢喺個人處女音樂DVD《SingleClips》入面公開咗自己在幕後工作時嘅片段，我大口羅拉發現阿幸並唔係傳聞中咁臭寸，佢同工作人員合作時，大家亦相處愉快，佢哋重為柴崎幸製造驚喜，同佢補祝生日。
柴崎幸入行嘅日子唔係好長，既拍劇又演電影，最近重唱埋歌，而佢最近推出嘅處女大碟《蜜》嘅反應唔錯，重出埋一張音樂DVD。相信除咗係柴崎幸人靚歌甜嘅MV吸引到fans之外，MV入面嘅幕後花絮片段亦好有可觀性，我大口羅拉咁八，當然要昅清楚佢拍MV嗰陣係咪好似傳聞中咁臭寸啦。
喺個MV入面，大家會睇到柴崎幸原來工作時好鬼認真，佢會遵照導演嘅吩咐，又經常好客氣咁同工作人員點頭，喺拍攝前後都會同啲手足有講有笑。而啲工作人員對柴崎幸亦都好好，好似趁佢拍完MV之後，喺後台預備咗好大嘅蛋糕同香檳，為佢補祝生日，畀個大驚喜佢。
重有嘅係班工作人員因為知道柴崎幸養貓，所以送咗個新款嘅貓籃同埋貓掃畀佢。
柴崎幸於是好開心咁攞住個貓掃喺地下係咁掃，好似玩緊隻貓咁。估唔到平時好惡死嘅柴崎幸，原來鬼馬得嚟都好平易近人。