昨日是張國榮逝世一周年，多個電台節目均以悼念哥哥為題，不少藝人如張學友、林憶蓮、林嘉欣及陳冠希等，均紛紛講出對哥哥的懷念，氣氛悲傷。
為悼念張國榮逝世一周年，香港藝人紛紛於各電台留言，向他們的前輩、好友說出心底話。
張學友：我一直覺得哥哥冇走過，我成日覺得佢係放假去咗旅行，咁樣諗大家會舒服啲。我遲啲有首叫《給朋友》嘅歌，呢首歌係寫當時有啲朋友走咗，我寫低咗當時嘅感覺，呢首歌係講一啲已經走咗嘅朋友，佢哋點睇在世嘅人，而且係佢哋去安慰番在世嘅人，而獨白嘅部份就係講在世人嘅心情。
林嘉欣：我前排同埋一班人去唱K，我哋成晚都有點你嘅歌，而且重跳埋舞。我哋時時刻刻都諗起你、掛住你，你放心啦，我哋過得好好，你唔使擔心，依然係你個肥妹。
努力堅持自我
陳冠希：哥哥，雖然你離開前我見唔到你，不過你留低好多好好嘅memory喺我心入面，總之我會永遠記住你，希望你𠵱家開心，睇住我哋、睇住香港。我記得你同我講過最好係做番自己、相信自己，我知你喺自己最困難時都係做番自己，所以我都好希望多啲人都可以咁樣表達自己，開開心心咁去做人。
袁詠儀：哥哥我係靚靚，呢一年嚟你點樣呀？我記得你同我講過，作為一個前輩要不吝嗇咁將自己經驗教畀啲新人，我有學你咁樣做。
蘇絲黃：國榮，我係阿蘇呀。你記唔記得三月二十九號我哋打最尾嗰幾場麻雀，你贏咗我幾千蚊，我話畀你聽，我用咗一年時間贏返。我話畀你聽我哋會點過啦，做一啲你想做嘅嘢，你係冇時間去做嘅，我哋已經plan咗下一個trip去邊，你最緊要同我哋一齊去玩啦。
林憶蓮：我係憶蓮呀，過去一年雖然香港面對咗好多困難，但係我覺得好多人都好堅強，好積極咁樣企番起身，希望你可以放心。我成日都記得你同我講，唔好匿埋，多啲出嚟唱歌畀大家聽，我一定會咁做。
填詞人林夕：你去咗嗰邊我就冇機會再幫你寫歌，我成日覺得好似自己身體一部份，不過已經失去咗。有啲嘢我已經唔識寫番出嚟，好似冇咗隻右手咁，嗰啲我會一路留畀你。
髮型師Herman：一年冇見你，梗係掛住你啦，希望你𠵱家重開心啲啦。過去呢一年，我好似忽然時間多咗啲咁，因為少咗你呢個大明星。
採訪：李珮洳、羅慧敏
