商台近排是非多多，大班噚日喺節目中透露，商台突然炒咗高級監製、民主黨深水埗區議員王德全。
王德全同八方講，佢喺商台做咗十八年，前日高層突然話同佢解除合約，噚日起唔使返工，佢成晚都瞓唔着，「高層話電台要瘦身，我惟有信佢啦，我唔敢講有政治因素，等我心情平復後恢復理智先詳細講。」
王德全喺商台一向負責監製王牌廣播劇《十八樓C座》，但幾個月前突然被調去搞足球同賽馬節目。商台一哥梁文道聲稱炒人「同政治一啲關係都冇」，但承認只係炒咗王德全一人，「唔可以講係瘦身，總之呢個係好商業嘅決定。」佢又話商台並無轉軚，「大班、毓民日日都鬧政府，冇變過。」咁又係，《十八樓C座》最近都時有加入大罵李柱銘劉慧卿等，開始轉向愛國，炒豬炒狗，又點會炒佢？
商台內部流傳，王德全舊年參選時將商台工作印喺宣傳品上，當做政治本錢，或者咁就埋下被炒伏線。
傳真︰2623-9278
電郵︰