茶大家就飲得多，處身石屎森林嘅你又知唔知茶葉點樣製成嘅呢？嚟緊幾日公眾假期，不妨北上短線遊，上珠海茶園學上山採茶，兼學自製陶瓷，帶番件獨一無二嘅紀念品返香港，開開心心過復活節。
記者：陳真
攝影師：林白
模特兒：Blanche、Julian（StarAsia）
山長水遠嚟到珠海，落車見肚餓，即刻歎番個「神農百草宴」先，上菜前有舞蹈表演，點解無端端有Show睇？負責人話：「神農氏時代族人經常跳呢隻舞，睇完表演，食百草宴會更投入，甚至感受到神農氏嘗百草嗰份意境。」意境？太深奧，唔明，不過表演認真得嚟又勁搞笑，睇得開心自然食慾大增。
「神農百草宴」有12道菜，每道菜都加入如益母草、火炭母、馬齒莧、人參花、當歸、靈芝等草藥烹調，負責人又話：「中醫角度嚟講，百草宴集排毒、滋陰、祛濕、清熱於一身，好補。」推介月季荷香蹄及雜菜鍋，前者滷水豬蹄肥而不膩，後者有人參花、益母草、薄荷葉、珍珠菜等8種茶園自家種植蔬菜，極新鮮可口。嫌唔夠餸？加餸囉，茶園有魚塘，自問技高運高，可即釣塘上鮮，魚穫即釣即蒸，免加工費。
食飽飽，係時候學藝，學乜嘢藝？落手落腳整陶瓷是也，放心，茶園有師傅即場教你，一定整得成，完成品可以委託茶園寄返香港，2星期內收貨。
製作過程分3個步驟：「成型」、「乾燥」同「燒製」。「成型」即係好似搓麵粉咁，將粘土加水，搓圓㩒扁，等粘土變軟就拎去「拉坯」，「拉坯」即《人鬼情未了》最經典嗰幕，將粘土放喺輪車上，雙手跟輪車轉，搓成心目中陶瓷嘅理想形狀；「乾燥」即將已成型嘅粘土放喺太陽下曬乾3小時，然後上色、上釉，最後係「燒製」，放入火爐燒製10至12小時，大功告成。
話明茶園，點少得採茶呢個節目？茶園有6年歷史，面積10畝，Blanche同Julian落田，行到腳仔軟。正式採茶，二人問：「棵茶樹咁大，應該摘邊部份樹葉呢？」園內王老師傅解釋：「摘茶樹最幼嫩部份，即係最尖尖嘅嫩芽同旁邊嘅幾片葉，例如龍井採1芽2葉，鐵觀音就採1芽3葉。」
採茶重要夾啱天氣，陽光太猛烈、下雨天或者葉上面有露水，絕對唔適宜採茶；採番嚟嘅茶葉，要先「晾菁」，放喺陰暗處吹風3至4小時，之後放入搖菁機「搖菁」1晚，搖勻茶葉裏面嘅水份分布，再「炒菁」保留茶香，最後係「捻菁」，即將茶葉捲成條狀。了解完做茶程序，大家重可以叫茶藝師傅教授茶道，飲番啖龍井，再過隔籬嘅巨型南瓜園睇3呎高南瓜。
買埋手信至好走
茶園入口處有個蜜蜂場，自家出產新鮮蜂蜜，推介神農清音茶（?128），成份有板藍根、苦丁茶、冬蜜、桔子汁，據聞板藍根有預防沙士功效，有無咁厲害就唔清楚，不過Julian試飲完話：「好潤喉，消暑解渴。」另一推介係茶籽油（?12），由山茶花提煉而成，有潤膚、潔面效果。
跟團去
旅行團：巨人假期（27399786）
一日團：每位$168，包國內交通、午膳（神農百草宴）及心靈茶園各項活動。
兩日一夜團：每位$368，包國內交通、珠海雙龍山莊或同級酒店住宿、早午晚三餐（晚膳神農百草宴）及心靈茶園各項活動。
自己去
去程：羅湖火車站出和平路華僑大廈，大廈門口乘專線巴士（?80）到拱北總站，茶園有專車接送。
回程：茶園專車回拱北總站，乘專線巴士（?80）回羅湖華僑大廈。
心靈茶園
地址：珠海市梅溪路農科所內
電話：（86）756-8508441
入場費：$30
神農百草宴：每位$98，3日前預訂。
租魚竿：每位$25，包魚餌。
陶瓷製作：大$120、中$80、小$55，包運費。