港股淡淡靜靜又一天，阿虎唔少證券界朋友都無心戀戰，走咗去排隊報日本團，享受免簽證之便。恒指收報12676，跌5點，成交縮至116.3億元。據聞，一本附有日本旅遊指南嘅雜誌幾乎賣斷市，呢一期國泰（293）日本線業務應該有強勁增長，不過國泰噚日仍跌1.25%，收15.70元。
華潤萬眾（331）首日掛牌，雖然見到瑞銀積極入市接貨，但仍不敵大摩及花旗等美資沽盤，結果破底收場，報4.175元，較招股價低8.2%，但從成交只得1.15億元看來，攻守戰況唔算激烈，估計瑞銀應該頂得住。
如無意外，新世界（017）將借殼亞洲物流（862）分拆電訊業務上市，但見到和記環球電訊（757）及華潤萬眾個殘樣，相信難有驚喜。
文傳（343）配股食白果，IBM入股暫時無望，復牌最多曾跌23%，低見0.53元。不過，文傳冇咗個橙執番個桔，因為文傳將以飛龍核心技術與IBM合作，在中國建立嵌入式新電腦工業標準，令跌幅收窄，收0.58元。
近期股份若遭洗倉，大股東多數入市增持，繼超人入市增持和記環電後，亞洲鋁業（930）亦獲主席鄺滙珍增持500萬股，刺激股價反彈8.2%至1.05元，成交有成１億元。文傳大股東金網資本打開口牌，話唔排除會增持，唔知文傳今日會唔會反彈呢？
阿虎