住宅樓價從去年低位大幅反彈，暫時已經好似到咗「行人止步」嘅水平，所以近嚟唔少投資者紛紛出貨，叫價都冇以前咁硬淨，議價空間大咗。
聽業內講，由於唔少投資者已經揸咗好多貨，所以想沽出就快夠期上會嗰啲，減低資金壓力。
好似荃灣愉景新城，一個六百一十呎單位，有個炒家用一百五十幾萬買入，實牙實齒話要一百七十八萬至肯賣，點知最近竟然用一百六十八萬賣出。另外唔少都肯減價。買家𠵱家可以唔使咁心急入市嘞。
業內人士話，呢個現象除咗係投資者唔想上身外，重有係因為有部份買家，見到個價係咁升法，決定唔入市。唔怪得呢幾日，大市成交突然大減啦！既然買家少咗，投資者想再賺多啲都唔得，咁不如趁早收割。
香港置業分行區域經理張國峰話，佢有個客，因為追求清靜，但又資金有限，所以喺將軍澳區啱價嘅選擇，僅得清水灣半島，睇咗四五個單位，最後揀啱六座高層A單位，九○三方呎，覺得好鍾意，出價二百六萬。
點知業主認為差好遠，唔制，個客頭三口價，業主都斷然拒絕。第四同五次由代理送定，亦唔成功，後尾追價到二百八十一萬，再由代理送定，先肯賣。
張國峰話，個客真係好鍾意呢個單位，唔係都唔會睇咗三次樓，同追價咁多次啦。
近排發展商啲樓賣得，就少咗搵銀行拍住做宣傳。
渣打按揭及汽車貸款業務主管夏鳳英，噚日趁住南豐搞活動，為浪濤灣貨尾提供按揭優惠，重宣布埋該行新出爐嘅九成按揭保險優惠。
凡向渣打申請按揭保險者，渣打都保證一個鐘內講番畀佢聽得唔得，同可以批幾多。如果渣打做唔到嘅話，就送半年家居保險畀佢以作補償。以一個千五呎單位計，一年保費約二千蚊。
夏小姐話，呢個唔係幾多錢問題，而係銀行對置業者一種服務承諾。
重有，呢兩個禮拜，凡申請渣打按保，都可獲贈五百蚊超市或電器購物券。
新地屬下啟勝管理嘅元朗加州花園，喺今屆香港花卉展中，由屋苑高級花王鄺貴榮帶領參賽，攞到三十二個獎，差唔多全場獎項總數嘅一半，認真威。
鄺花王其中一個參賽作品「鶴之華」，就攞到蘭花組「最佳展品」榮譽。
屋苑採用「步移景轉」概念，設計兩個公園，等住客喺唔同位置，都可以欣賞到公園美景。
其中「冥想園」利用椰樹、杉木、石塊將原本放石油氣箱掣嘅草地，變成具峇里島度假色彩嘅亭園。「疊水源」就用睡蓮花池、小溪同石卵小徑，令到公園充滿動感。屋苑滿種奇花異卉，住戶梗係身心舒泰啦！
法國餐愈嚟愈普及，唔再係豪客至食得起。長實同新地嘅長沙灣宇晴軒，為咗幫將推出的第二期做勢，長實特別同系內海逸酒店搞法國美食節，下個月舉行，為期兩周，到時會有唔少美食同靚酒提供。
為促銷大單位，發展商向二期海景相連戶買家，送出法國大餐餐券四張，價值五千。除咗買家之外，發展商會喺售樓處設有美酒，畀睇樓市民品嘗，睇樓之餘又可享美食。
配合今次法式大餐主題，長實噚日特別同海逸酒店搞法國午餐，重搵嚟鑑酒專家教飲酒。切合樓盤嘅歐洲主題，二期會所設有恒溫酒櫃，畀住客存放名酒，閒來邀請朋友淺嘗一番。
蘭西
電郵地址：
