周三連場國際賽，當中最有冷味，非世界盃亞洲區外圍賽，南韓作客馬爾代夫打和○比○莫屬！
呢場波南韓並未有因為對手實力較弱而遣副選或新人上陣，相反重有李榮杓及薛琦鉉等外流球星壓陣，不過都要被馬爾代夫呢支目前世界排名第一百四十二，重低過我哋香港隊嘅球隊迫和，難怪賽後南韓國內傳媒及球迷都怒吼國家隊表現不濟，矛頭更直指葡萄牙籍教練高爾奧，睇情形重有手尾跟。
咁又係嘅，中國隊喺上屆世界盃外圍賽都曾經大勝馬爾代夫十比一，貴為該屆賽事第四名嘅南韓，竟然連一球都入唔到，抵鬧！
前晚另一場國際友賽，葡萄牙主場對意大利，賽前有博彩公司及電視台列明直播及開賽時間，為本地時間周四凌晨四時三十分；賽前一日再改為四時十五分開賽；到賽日又再將開賽時間更正為三時四十五分開波！呢次混亂就搞到唔少人錯過落注，其實「收費台」都係受害人之一！
皇馬中場碧咸喺禮拜日作客阿爾巴塞特時，將會不斷聽到主隊球迷用英文鬧佢；事緣嗰度有間英文學校為咗宣傳，就派啲寫有英文鬧人語句嘅小冊子畀球迷，等佢哋可以喺禮拜日搵碧咸嚟練習。碧咸自從出名之後，經常俾啲敵對球迷鬧到狗血淋頭，我相信咁做對佢冇乜影響。
巴治奧日前首次開腔，話如果查柏東尼真係重召佢入國家隊踢月底對西班牙嗰一場友賽，佢就樂於再披國家隊戰衣。照咁睇，呢場「巴治奧國際告別賽」成事機會好高。十年前世界盃，巴治奧對西班牙單刀妙射令人記憶猶新，再對西班牙作為佢國際賽終結，不失為一件美事。
車路士班主阿巴莫域治日前就搵英領隊艾歷臣過檔一事，同領隊雲尼亞里道歉；而雲尼亞里事後表現得好得戚，重話以後嘅嘢慢慢講，𠵱家最重要就係幫隊波踢好英超聯同歐冠盃。雲尼亞里一直傳會俾車仔炒魷，雖則阿巴莫域治道歉亦唔代表佢可留隊，但起碼攞番個彩。