日籍男童星原島大地參演電影《忘不了》獲提名金紫荊的「最佳男配角」，而他與張栢芝更建立深厚情誼。栢芝對大地愛錫有加，大地也說：「我最鍾意嘅女仔係張栢芝。」實行與謝霆鋒及陳小春爭一日長短。
年僅六歲的日籍男童星原島大地，憑電影《忘不了》角逐金像獎的「最佳新人獎」，但因該片非其接拍的第一部電影，故被取消資格。其後大地憑該片入圍金紫荊的「最佳男配角」，對於未能得獎，大地天真地說：「可能我太細個，佢哋要上台講嘢，我都唔知講乜嘢好呀。」
大地拍《忘》片時與女主角張栢芝出雙入對，二人十分投契，大地日前在母親陪同下接受訪問，提到張栢芝，他的笑容比謝霆鋒或陳小春的都要甜蜜。
大地表示栢芝是他最喜歡的女仔，他說：「佢帶我去佢屋企玩，又帶我去游水，佢屋企有泳池㗎，重有個肥仔一齊玩呀。」大地所指的肥仔，應該就是栢芝細佬大番薯。
在旁的大地母親原島玲子也說：「我好感激栢芝好錫大地，佢哋食飯飲嘢都你一啖我一啖，完全不厭其煩咁錫佢。栢芝去日本玩，都特登買一大堆玩具返香港，等去北京宣傳時，再帶去北京畀大地。佢喺北京同我講，叫我自己搵朋友去玩，個仔可以留畀佢照顧，真係好好。」
問大地最喜歡哪位歌星？他說：「我唔記得佢個名，唔記得佢唱乜嘢歌喎。」想了一會，大地大叫：「係郭富城呀！」大地表示很喜歡唱歌，問他想不想做歌星？他說：「好，我要唱英文歌。」
原島玲子表示大地將為《伙頭智多星》客串演出，又已接拍中國星新戲《國產009》，寰宇正計劃稍後開拍《星仔走天涯》讓大地擔正，她說：「我考慮幫大地簽番個經理人，有幾間傾緊，𠵱家最想等《星仔走天涯》開咗先，個仔有演戲天份，又有咁好機會，我唔可以抹煞佢嘅機會，不過佢都六歲，讀書可能要推遲一年先。」
大地父親在日本工作，三個月來港探望兒子一次，每日通電一次，問大地拍戲辛不辛苦，他默不作聲點一點頭，然後把頭垂下，未幾注意力又返回玩具上，再展露歡顏。
採訪：蔡如玉 攝影：仇志德
