雖然班亞弗力（BenAffleck）同籮霸珍妮花洛庇絲（JenniferLopez）分咗手都成兩個幾月，不過當地傳媒對「Bennifer」（班妮花）似乎重好熱情，關於佢哋嘅傳聞仍然一浪接一浪。班仔話俾人問舊戀情問到煩，所以早排佢喺電視度公然同男星接吻，我羅拉見到都俾佢嚇親！
上星期班仔就去咗《SaturdayNightLive》做嘉賓，其實佢上節目前都講明會玩番自己同籮霸單戀聞，不過大家估唔到佢玩到咁癲。當日班仔喺一齣短劇裏面做番自己，為咗配合近期好hit嘅同性戀婚姻話題，班仔喺劇中同電視男星SethMeyers去咗結婚，之後重嚟個深情濕吻，最後班仔宣布要做同性戀者，以後同女星絕緣。
之後班仔又攞住件印住ben-gay字樣嘅T恤，佢話近期聽到有傳聞佢同籮霸分手係因為老死麥迪文（MattDamon）介入，班仔話單嘢完全係流，因為佢已經一早同麥迪文結咗婚喎！