經紀黃上個月中，話過北泰創業（2339）陸續有動作。果然，最近公司接連有消息公布，包括成立合資公司生產汽車傳動軸產品，另外又同第一汽車集團全資附屬富奧汽車零部件簽署合作協議，成為獨家海外代理商。
北泰股價亦有表現，噚日在淡市中急升8%，收2.975元，成交股數亦增加至332萬股，金額968萬。
經紀黃話，咪話唔事先通知，北泰過多一陣就上市夠半年，唔排除近期一連串動作同埋股價異動，係批股集資嘅先兆。
小初不以為然，因為家陣除咗新股唔受投資者歡迎外，想成功批股亦唔係咁容易，但經紀黃舉例反駁，話理文造紙（2314）上個星期上市剛夠半年，在市況欠佳嘅情況下都成功批股，重要係成8億銀咁多，所以北泰就算搞批股，未必話唔成功。
小初始終有戒心，因為就算北泰真係批股，亦唔代表股價一定向上炒，北泰舊年上市招股價只係1.33元，半年唔夠已上升唔止1倍，其實以現價批股都已經執唔少。
慕容小初