畢業於港大嘅偉易達主席黃子欣（圖）昨日應邀回到母校，向師弟師妹傳授當年創業嘅經驗。佢話一畢業就走咗去一間跨國公司打工，做落冇耐就同一班同事自行創業囉！時為前殖民地好世界嘅一九七六年。
佢重好記得當年唔夠錢，要去恒生借錢，但恒生一口拒絕，因為佢無嘢抵押。於是佢哋只有左借右鐸，幸好最終都夠錢開公司，成名作就係室內乒乓電視遊戲機，為公司賺到第一桶金，故此佢間公司英文名叫V-tech，個V字就係出自電視遊戲VideoGames。
不過，黃子欣話偉易達都唔係成日順風順水，好似二○○○年，因為錯估形勢，令公司錄得成立以來首次虧損。
一九九七之後，又點止佢一個錯估形勢吖，人人都以為真係可以繼續繁榮㗎喇。今時今日，啲外資走得七七八八，得番啲中資塘水滾塘魚，啲大學生又何來跨國公司可以學嘢吖？
傳真︰2623-9278
電郵︰