星期二本欄講阿仙奴球迷鬧有線，肥陳立即打電話嚟為有線電視呼冤，佢話：「左丁山，你幾時變咗阿仙奴fan屎呀？其實我哋播ESPN足球，對曼聯、阿仙奴絕無偏好，純粹係有乜播乜，只係Carrier啫，一切足球賽選擇，統統由ESPN決定，有線冇權干預。阿仙奴球迷鬧我哋偏心曼聯，好冤枉呀，請佢哋向ESPN反映意見啦。」
下季英超聯足球轉播權，盛傳由有線奪得，ESPN冇咗香港播映權，即係話下一季嘅播映安排，包括製作，都係由有線負責。消息傳出後，好多外籍觀眾紛紛投函西報，堅決要求下一季有線要提供英文評述，唔可以清一色廣東話。咁都係啱嘅，香港畢竟係國際城市，播英超聯足球而冇英文評述，香港就太過鄉下咯，左丁山自己鍾意聽英文講波，ESPN嘅主持人JohnDykes及新加坡嘅主持人，非常專業，譬如上星期日阿仙奴對曼聯，ESPN喺賽前嘅推廣Promo、賽事直播嘅事前分析、事後評論都做得好出色。正是珠玉在前，有線想搞得好過ESPN，實在唔易。
以此問肥陳，肥陳講：「我哋轉播世界杯，都有聲有色呀，下季嘅賽事，尚未證實，暫時無可奉告，只係有一件可以確定嘅，就係球賽太多，不能盡錄，到時會熱鬧到飛起。」左丁山乃係標準球迷，邊個電視攞到播映權唔緊要，最緊要就係唔好苛待我哋啲球迷，粗製濫作。既然肥陳拍晒心口，又冇理由唔信佢啫，總之一句講晒，拭目以待。