柏芝包抄嘉玲爭后座<br>金像獎影帝雙華大戰

柏芝包抄嘉玲爭后座
金像獎影帝雙華大戰

本屆香港金像獎最受注目的影帝和影后寶座由誰奪得,近期成為影圈中人熱門話題,普遍人都認為影帝將是雙華(劉德華、任達華)之爭,影后則由張栢芝與劉嘉玲激鬥。

今屆香港電影金像獎頒獎禮於後日舉行,最受矚目的「最佳男、女主角」獎,今年究竟花落誰家,外間一直很關注(提名名單見附表)。綜合各方意見,在《大隻佬》演和尚的劉德華,以及在《PTU》演機動部隊隊長的任達華皆是大熱,而後者已在金紫荊獎中先拔頭籌;至於影后熱門則是有《忘不了》及《大隻佬》兩個提名的張栢芝與《無間道II》的劉嘉玲之爭,《金雞2》的吳君如則被視為黑馬。
鍾鎮濤看好劉德華奪得「最佳男主角」,他日前表示:「我覺得華仔喺呢部戲入面掌握個角色掌握得好好,恰到好處,不慍不火。」

兩提名分散票源
至於女主角方面,鍾鎮濤認為劉嘉玲會獲獎,他說:「嘉玲嘅演技唔使我多讚啦,我覺得佢喺《無間道II》嘅表現已經到咗爐火純青嘅地步,佢好出,部戲有咁多好戲嘅男人,佢都冇俾人搶晒鏡,你睇完部戲後,除咗其他男主角,唔會忽略佢嘅存在,做到咁唔容易㗎。」
而影評人海濤則看好任達華奪影帝,他日前表示:「我覺得任達華喺《PTU》嘅表現令人難忘,加上佢演技一向唔錯,始終欠少少運氣攞唔到獎,所以評審投票時都會加埋呢啲累積分數。女主角方面其實嘉玲同栢芝都好,但栢芝喺《忘不了》表現有啲過咗火位,加上佢有兩部片提名,多少會分散票源,反而嘉玲喺《無間道II》呢啲男性戲入面仍然搶鏡。」

造型佳忽略演技
編劇鍾繼昌則看好《金雞2》的張學友奪影帝,君如則奪影后,他接受電話訪問說:「雖然好多人覺得應該係劉德華同栢芝得獎,但我覺得學友同君如喺《金雞2》表現好專業,完全將角色掌握得恰到好處。至於栢芝喺《大隻佬》同《忘不了》做得唔錯,不過佢嘅表現其實重有發展空間,而劉德華喺《大隻佬》嘅造型實在太突出,反而令人忽略佢嘅演技。」
採訪:陳月媚、蔡如育

任達華《PTU》
着得呢套制服,氣勢都贏晒啦!
設計對白

張栢芝《忘不了》

劉嘉玲《無間道II》

吳鎮宇《無間道II》

林嘉欣《戀之風景》

張學友《金雞2》

吳君如《金雞2》