呢排無論大劉抑或細劉，都頻頻在財經版出現，分別推介各自主理嘅華人置業（127）同埋新股利福國際(1212)，前者小初喺度已經講過好幾次，股價家陣企硬喺5.40元，算好有交代，至於後者應唔應該認購？小初同數個老友傾過，結論係如果睇好零售股，不如買寶姿（589）好過。
寶姿剛剛公布截至2003年12月底止全年業績，盈利1.08億元人民幣，比起舊年上升15.7%，末期息派23分，都算係咁上下。
小初記得，寶姿舊年上市時甚受芬佬歡迎，上市以來股價最高見16.80元，呢排大跌市回吐有限，噚日仍收14.25元，成交則好細，只得3萬大股，但呢個情況正好反映街貨由芬佬坐晒。
小初問過身邊嘅女性朋友，都唔多覺佢哋有買寶姿嘅衫，但經紀黃話唔可以咁睇，皆因寶姿主力發展大陸市場零售業務，目標以祖國同胞為主，兼夾走高檔路線，同其他走大眾路線嘅大陸零售股如旭日（393）等相當唔同。
小初亦同意，家陣唔流行抽新股，倒不如炒現成股票好過。
慕容小初