樓價急升，自然吸引搵快錢嘅炒家摸貨圖利，利嘉閣測量行高級營業董事翁鎮滿話，今年第一季，共錄得八十二宗舖位摸貨成交，多舊年第四季逾一倍，當中最誇張係一個舖七日內摸三轉。
舖位係紅磡商業中心商場地下四十二號，最初以一千二百八十萬成交，跟住就用一千三百八十萬摸出，第二次摸出價係一千四百六十六萬二，第三轉就升至一千七百九十七萬八。前後七日，累積升幅有成四成幾，係咪夠晒誇張呢！第三名炒家幾日獲利三百三十幾萬。
呢啲二線舖位，今年第一季共有四十宗摸貨，九成半有錢賺，表現比一線重好，賺幅最大一宗係旺角月圓大廈地下一個舖位，二月初以二百一十八萬成交，月底就以四百八十萬摸出，唔使一個月升咗一倍二，賺二百六十二萬。呢啲極短炒獲利成交，真係高手至做得到，一般人好易炒濃，都係不試為妙。
科技愈嚟愈先進，大型屋苑管理系統走向人工智能化，信和花咗兩年時間，用一千萬元，同香港生產力促進局研製出iPromise，嶄新的物業管理系統，令管理層每日面對工作流程、員工管理、顧客服務，同埋資源管理等各方面監控更有效率，減省成本。
信和物業管理總經理杜日生話，𠵱家已採用該系統嘅有屯門黃金海岸、尖沙咀中心，集團會分階段將系統推行至全部物業，預期今年底九成物業會落實採用該系統，之後，重會引進內地包括廣州、上海、福州等地區約十個項目。
蘭西
電郵地址：