沈殿霞（肥姐）早前為羅霖主持嘅新城節目擔任嘉賓，喺節目度提到愛女鄭欣宜嘅減肥血淚史。
肥姐見到欣宜瘦咗咁多，開心之餘就梗係肉痛，佢話：「欣宜以前可以不停咁食，終於肥過座山，因為擔心再肥落去會影響健康，所以要佢減肥。有時都會好痛心，究竟欣宜啲肉去咗邊？又驚佢食唔飽辛苦。」
講到欣宜嘅拍拖問題，肥姐就話唔會反對，只係希望欣宜拍拖時會畀佢認識佢嘅男友仔，而結婚後可以每晚返屋企食餐飯。肥姐重透露欣宜曾經同佢講過結婚後每晚都會返去同肥姐瞓，不過佢就笑住話：「佢哋兩公婆唔離婚先怪！」
此外，肥姐前晚喺電視城主持新節目《麻雀王爭覇戰》，係人都知肥姐鍾意打牌，肥姐之前話欣宜唔鍾意佢食煙同打牌，所以佢戒過煙，但好似唔成功，前晚肥姐改口話，等欣宜減肥成功後，佢就戒煙，肥姐話：「我唔使返工又冇拖拍，惟有寄情麻雀，打牌可以防老人癡呆嘛。」
又話心痛又希望欣宜減肥成功，做媽咪嘅心情真係矛盾！
張達明噚日去美孚錄影RoadShow節目，達明𠵱家好努力咁去籌備今個月舉行嘅「TatMing一咀Show」，其中有個環節會表演凌空劈磚絕技，已經練咗一星期，其他節目當然唔少得就係扮吓政治人物，諷刺吓佢哋咁啦。問達明怕唔怕醜化人？佢理直氣壯話：「我係醜化佢哋，驚乜呀？表達政見係自己嘅權利。」
即將喺七月做新娘嘅林雅詩（Grace），就嚟淡出娛樂圈，但係冇幾耐就會見到佢以超性感嘅造型出現喺各大小雜誌封面，最近Grace又再登上一本名為《girls》嘅男士雜誌封面，佢重豪情奔放咁大講男人經，話男人滿口大話，係世上最壞嘅生物，但係未婚夫就例外，重讚佢係男人中嘅絕世好男人㖭，認真誇張。
雖然文雋早排公開講話有人縮沙唔想幫手做柯受良（小黑）籌款演唱會，但噚日佢喺尖沙嘴港台搞嘅「香港電影月」活動，講起幫柯受良籌款演唱會時，就話𠵱家個騷落實叫《飛越理想演唱會》，下個月五號同六號喺杭州舉行，由曾志偉、吳宗憲做召集人，答應幫手嘅歌手暫時有劉德華、張學友、任賢齊、周杰倫同庾澄慶等。
林曉培同張佩金同屬一間經理人公司，由於張佩金喺上海遇車禍之前，已經錄咗三首歌，所以當林曉培知道佢重喺醫院，噚日就特別嚟香港，幫張佩金隻碟唱咗一首歌。佢話暫時未同張佩金通過電适，但就已經同Harry傾過偈。
日本女星田中麗奈兩年幾前嚟過香港一次，都好鬼哄動，佢又啱啱宣布今個月九號又會旋風式訪港一日，宣傳佢同妻夫木聰合作嘅電影《日出前向青春告別》。聽講套戲喺香港國際電影節播放嘅場次已經一早賣晒飛，而麗奈只會即日嚟即日走，fans想見佢就真係要把握機會。
