港股前日大升逾200點後，噚日反反覆覆，升40點，收報12681，成交140.89億元。
中聯系統（757）前日大跌21%之際，超人入市掃貨接咗6052.4萬股，佔當日成交股份約10%。消息只能支持噚日中聯股價反彈4%，收0.50元。e莉莎話，有份接貨嘅芬佬們仍然唔高興，因為長和系入股中聯成本，每股0.80元，批股價0.90元，當股價跌破0.80元時，超人就算唔係真心，都應該作狀入市以示支持，要捧場客輸近50%才肯出手，搞到屍橫遍野，如果捧場客個個損手爛腳，日後重邊有銀彈接佢另一隻電訊股呢！
利豐（494）早前公布業績差過預期，大行紛紛調低其盈利預測及投資評級，以致股價跌破12元關口。近日瑞銀獨排眾議，以公司將派高息為理由，將其投資評級由「中性」調高至「買入」。利豐手頭現金有23億元，如果唔進行收購擴展業務，又確實令市場憧憬公司會慷慨派息。但諗深一層，唔少資金流入股市，其實唔志在1年幾厘息嘅回報。
亞洲鋁業（930）中期業績倒退53%，噚日一度跌至0.87元，最後跌幅收窄至3%，收0.97元，成交高達2.46億元。據聞今次引致基金洗倉，主要是因為分析員所收到嘅料，與實際業績有很大距離，令證券界十分不滿。不過，由於早前發生過新世界（017）公布業績前，高盛事先收到料，令有關分析員被證監會抽秤，今次分析員不敢在證券報告中明目張膽地玩踢爆、玩唱衰。
阿虎