大家唔知記唔記得，二十一歲少女歌手SONIM當初所屬嘅組合EEJump突然解散，搞到佢被迫一個人出嚟唱歌，重要走性感路線。近排靜咗一輪，原來SONIM轉咗去間專搞地下音樂嘅唱片公司，而且重變番天真爛漫嘅少女㖭，個look時大時細，我羅拉真係俾佢搞到頭暈。
SONIM自從簽咗新公司後，拍咗套劇《向天國打氣的啦啦隊》。喺劇裏面，佢同主角石原里美一齊做高中生俏啦啦隊員，重做埋市川由衣嘅師姐，拍完之後又同石原做咗好朋友，佢話：「我入行咁耐都未做過偶像做嘅嘢，以後我要做番夠本！」
我羅拉八到，其實SONIM好唔願意喺人前露肉，所以一直強顏歡笑，𠵱家轉咗間細公司，雖然宣傳少咗，但佢起碼唔使真空着條圍裙影唱片封面。呢排日本興起打女子長曲棍球，SONIM就走咗去明治大學度做咗幾日臨時球員。不過玩完之後，佢成身痠痛咁話：「原來比睇嘅難好多㗎，好似打格鬥技咁！」