二○○七年有冇得直選特首，一單還一單，九月立法會選舉，雖未正式埋牙，早已戰雲密布，功能組別議席係兵家必爭之地，因為民主派直選加功能組別，加埋攞到二十八席咁上下，已經冇乜問題，喺九月之後，特區政府嘅行政重心，就會由特首辦轉移咗落立法會，亦即剩低嗰三兩席，歸向邊一邊，香港嘅前途就喺邊一個方向。
現時有一種講法，就係九月之後，香港嘅特首，將會係潮州怒漢詹培忠。點解？因為早餐派瓦解，肥詹正計劃發動「四五行動」，亦即拉攏四五個功能組別嘅中性議員，成為第三勢力，任何政策取向，投票一旦倒向民主派，就癱瘓特區政府，一旦擁吻政府，呢個奄奄一息嘅弱勢政府又可以起死回生！
「四五行動」嘅灰色俱樂部成員，除咗肥詹，重有何鍾泰，同埋即將高調挑戰自由黨楊孝華、循旅遊界出線嘅謝偉俊。呢一股第三勢力，特點就係曾受不同程度嘅政治迫害，喺爭議中成熟，喺醜聞中發育，而且除卻巫山，曾經滄海，一個個到咗無欲則剛嘅崇高境界，話之你阿董、民主派，定係白宮同中南海，自己唔係冇錢，毋須硬性畀面，唔睇面色，一味夠激，係真正具有獨立人格嘅另類精英。雖由詹培忠揸旗吹雞，不過君子之交淡如水，傾得埋則坐低飲幾杯紅酒，興致到又可以青蛙過河各自搵食打江山，淨係靠詹培忠一個人嘅風趣魅力，都夠鎮得住個場，所以話詹培忠係九月後嘅事實特首，強勢治港，真係一啲冇錯。
現時中方對於呢股草莽勢力，亦十分緊張。皆因為民主派嗰邊，大律師四大天王：湯家驊、梁家傑、余若薇、媽田Lee，分分鐘加埋吳靄儀，受過英式法治訓練，思考力敏銳，講嘢極有說服力。比起親中陣營成班維園阿伯阿嬸，可以講係超晒班。
親中呢邊，由於歷史嘅原因，對法律界統戰工作，一向難咬得入，只得俘獲得一件半件如劉漢銓、廖長城等紅色律師幫口鬧吓漢奸。可惜法律界呢一行好邪，但凡英式律師，無論口才幾掂，一轉軚親咗中，形象就當堂瘋狂大跌watt。「四五行動」之中有個九九八離婚套餐王謝偉俊，一向唔埋民主派堆。不過收費平，亦唔等於支持維園阿伯。阿Paul影過裸照，喺人權方面，思想亦相當之鬼仔，喺澳洲留學，兼操牛津式英語，喺民主自由嘅大是大非方面，佢站在廣大市民一方，隨時加多一票，亦唔係絕對冇可能。
下屆嘅立法會，真係龍蛇混雜，除咗有肥詹做及時雨宋江，重有智多星吳用、入雲龍公孫勝、黑旋風李逵、母大蟲顧大嫂、青面獸楊志，你話幾好睇呢係咪？
傳真︰2623-9278
電郵︰