大市雖續升，但始終予人有唔夠力之感，恒指收市升40點，期指跌37點，低水86點，投資者對反彈都冇寄予太大期望，特別係下禮拜又有長假，短期大市都係窄幅上落居多。
好多間公司嘅業績，都比預期為佳，華人置業（127）更由「大蝕」變「大賺」。雖然公司事先已張揚，話去年證券投資賺大錢，而市場亦估計其整體盈利會有8至9億元，但實際盈利仍超出許多。
03年（12月年結），華置營業額25.3億元，升247%，盈利11.53億元（02年虧損14.78億元），每股盈利0.52元，末期息12仙，全年合共17仙，派息比率32.6%。期內，公司更以實物方式，向股東分派至祥（112）股份，相當於每股4.9仙。
華置賺大錢，主要係售樓有收益同租金收入上升，最重要係上市證券投資獲利1.08億元，還有未變現收益4.38億元。另外，公司致力節流及利率低企等，亦令公司業績有再上層樓的表現，期內行政開支就減少13.2%至1.88億元，而財務費用更大減40.3%至1.9億元。由於樓市復甦，公司發展中物業亦回撥4699萬元。
華置擁有高質素的商業及零售物業投資組合，大部份位於黃金購物區，如銅鑼灣、灣仔、尖沙嘴及旺角，出租率極高，接近90%，今年首季，集團的零售及寫字樓平均租金已分別上升25%及20%，預料上升趨勢仍會持續。
發展物業方面，今明兩年有7個樓盤推出，合共2500個單位，預期將會為集團帶來可觀盈利貢獻。
現年度，來自售樓及租金收益肯定大增，而股市亦會反覆向好，集團現時持有約20億元的證券投資，若恒指年內見16000至18000，投資獲利亦可達6至8億元，因此，全年盈利有頗大機會再創出新高。
03年度，華置投資物業重估盈餘26億元（經調整後僅比02年底增值18%），令總資產淨值上升到143.68億元，每股淨值6.64元。商業物業價值今年首季升勢更急，個別升幅由30%至50%不等，預計重估可再增值42億元，每股資產淨值上升至8.6元，對股價有拉動作用。
郭兆誠