香港呢個彈丸之地真係巴閉，好多嘢都可以威到入健力士世界紀錄大全，不過今趟列入世界大全嘅紀錄，就係一宗醜事。
新地及新世界較早時取得紅磡紅灣半島，更表示可能拆掉呢幢居屋王，住都未住過人就話要全部拆卸，環保團體地球之友話紅灣半島一旦清拆，產生嘅廢料可以裝滿二千一百部雙層巴士，咁破壞環境嘅事都做，所以地球之友已經入紙向健力士世界紀錄大全備案，一旦發展商清拆工程付諸實行，將申請「最大規模清拆未入住大樓」同埋「清拆最高建築物」列為兩項世界紀錄。
咁啱，新地副主席郭炳江噚日現身東亞銀行年會，佢重申，𠵱家重同則師研究緊三個方案，包括全部拆卸、不拆卸或只更改圖則等，希望年底有決定。
至於有傳話新地同長實聯手競投西九龍文娛藝術區。江少嘅回應係「唔肯評論」。
傳真︰2623-9278
電郵︰