所謂「同人唔同命、同遮唔同柄」，巴夫斯雖然俾曼聯終止咗份合約，但就揸住成三千四百萬港紙走；但有可能俾多蒙特炒魷魚嘅阿武羅素，走嘅時候可能連一個仙都冇。
聽講多蒙特多次要求𠵱家喺巴西養傷嘅阿武羅素返德國慢慢唞，但係阿武羅素又死都唔制，搞到多蒙特班高層非常不滿；於是，多蒙特就以阿武羅素唔尊重球會為理由，諗住喺呢一、兩日同佢解約，不過佢哋就一個仙都唔會賠畀阿武羅素喇。
係人都知多蒙特𠵱家好唔掂，今夏可能要賣戴迪同羅斯基套現；而年薪成四千三百萬港紙兼養傷多過踢波嘅阿武羅素成開刀對象，亦可理解。雖則多蒙特咁做好不近人情，但如果唔係阿武羅素佢玩嘢先，相信多蒙特亦唔會咁絕；阿武羅素如果要怪，就怪自己唔識做人啦！
羅馬球會日前收到一個好消息同一個壞消息，壞消息係俾意足總罰佢哋喪失一場聯賽主場（應該係本月底對安玻里）之利，理由係上個禮拜場羅馬打吡戰發生球迷搞事。至於好消息係SkyTV預支千幾萬歐元轉播費畀佢哋，雖則呢筆錢唔足以解決羅馬財困問題，但總算雪中送炭。
我求大俠間唔中就會提吓智利前鋒沙拉斯，講到尾佢響智利國家隊確實好有影響力。好似前日佢三年嚟首次重披國家隊戰衣就間接建功，幫智利響高原環境砌低玻利維亞，據報講佢一復出後，隊波即刻「生」晒，今屆睇南美洲區外圍賽，值得留意番智利呢支黑馬嘞。
米禾爾領隊韋斯日前就話，佢哋主席柏希迪斯講過如隊波踢到來屆歐洲足協盃，就喺倫敦裸跑；因另一場英足總盃準決賽嘅兩支球隊曼聯同阿仙奴都肯定打歐冠盃，只要米禾爾喺禮拜日場波打贏新特蘭，就可參加下屆歐協盃。睇嚟柏希迪斯要睇吓本報嘅Fit男Fit女，操番靚個身先得！
勒邦占士同安東尼呢兩位NBA新秀狀元同探花，喺三日內分別創個人職業新高四十一分，之前佢兩個都經常一個創完新高另一個無耐又有好表現，好似占士十二月中攞咗三十七分，安東尼唔夠兩星期又入三十七分，都唔知係咁啱呀，抑或佢哋暗自以對方成績嚟鞭策自己喇。