個市再升，油股風騷。中海油（883）升4.7%，中石化（386）升4.3%，中石油（857）升1.9%。油價近期回落，有機會升番，啲油股行先一步，可搵啲石油Call輪炒吓。
中石油Call輪揀9405，6月到期，輪價22仙，溢價3.7%，槓桿率17.8倍。中石化Call輪揀9909，輪價85仙，7月到期，負溢價2.3%，槓桿率3.5倍，呢件交投較疏。中海油Call輪揀9032，6月14日到期，輪價25仙，負溢價1.47%，槓桿率6.7倍。
國內電訊股以中電信（728）靚啲，升1.9%，其次中移動（941）升0.7%，聯通（762）則跌1.4%。中電信今日除息6.89分人民幣，相等於股價2.4%。炒中電信輪，要計埋呢個因素，而即使係咁，9910都係好抵買，6月到期，輪價41仙，負溢價2.2%，槓桿率6.7倍，以中電信除息價2.685元計，9910實際都係平水左右。
恒指昨日升40點，但恒指Call輪跌多過升，理由係期指低水，而且今日踏入4月份，心理上屆滿期「短咗1個月」，愈近到期日，啲溢價會縮得好快。恒指Call輪9282好多人炒，輪價8.2仙，槓桿率49.9倍有刀仔鋸大樹作用，但睇埋下月28日到期，溢價仍然有4.5%嘅因素，則買唔買得過要諗過先。
章盛