各行各業都有佢哋一套獨特嘅術語，最近警隊同新城電台合作搞嘅節目《深入警界》，每集都會講解警隊內嘅古怪術語，同埋一啲有趣典故。
八方噚日同負責喺節目中做解古佬嘅督察黃錫波（圖）傾偈，黃Sir話警隊嘅術語背後都有一段歷史，例如話「人情」，喺四十年代前，全港打工仔都冇放假呢支歌仔唱，警察都要日日開工，若果屋企有事，就要同上司攞個人情，先至可以放一日假咁大把，所以「人情」就代表放假咁解。
重有就係來自英文barracks（兵營）嘅「bar叻」，原來係指負責警署入面雜務工作嘅警長等。如果想聽古仔，就要喺呢個禮拜六下晝五點收聽呢個節目，節目內重會有來自十三個警隊單位嘅警務人員現身說法，介紹所屬單位嘅工作。
傳真︰2623-9278
電郵︰