今屆香港電影金像獎頒獎典禮舉行在即，在「最佳男配角」和「最佳女配角」兩個獎項中，邵美琪憑着在《PTU》的出色表現得到不少支持，而《大隻佬》的張兆輝亦被看高一線。
金像獎頒獎禮將於周日（四日）假香港文化中心舉行，除了最受注目的「最佳導演」、「最佳電影」和「最佳男、女主角」外，今屆的「最佳男、女配角」亦競爭得十分激烈（提名名單見附表）。女配角賽前大熱是在《PTU》演機動部隊的邵美琪，她已在金紫荊獎先下一城，男配角大熱則為在《大隻佬》演幹探的張兆輝，兩人同以演警察獲得提名。
《大隻佬》男主角劉德華表示，一直都看好張兆輝會贏得「最佳男配角」，他日前說：「我一路都好鍾意佢喺部戲入面嘅表現，佢真係做得好。一個普通警察嘅角色，佢可以做得好有火，好搶戲。」華仔謂盧巧音在《六樓后座》的演出，應該會得「最佳女配角」，他說：「佢做得好自然，好生活化，令人睇落覺得好舒服，配合到部戲嘅需要。」
至於《無間道》系列導演劉偉強，就較看好邵美琪，他說：「邵美琪做得幾好，佢個角色要喺大男人世界入面做到好tough（堅強），角色好簡單。佢有一句對白係我好深刻，佢話『出更好危險，點都要平安返嚟』，講得好有力，有幾場戲都演得好突出。」
影評人曉龍則說：「好欣賞邵美琪，佢個角色嘅對白同語氣都配合當時環境，尤其係車入面講個句對白，無論語氣同表情都好適合，《PTU》係邵美琪從影以嚟做得最好。其實何超儀喺《豪情》都演得幾好，雖然有小小過火，但都配合到角色性格。男配角我會揀廖啟智，佢所做角色好深沉，有發揮空間，面部表情控制得好好，完全表達到角色性格。」
採訪：魯萍、蔡如育
