澳洲游泳天王IanThorpe係澳洲國寶，今年參加雅典奧運，攞金牌可說十拿九穩，佢想參加一百米、二百米、四百米賽事，而佢係二百米、四百米世界冠軍，搵人同佢爭，怕難啲啩！
點知Thorpe馬失前蹄，喺三月二十七日參加澳洲奧運游泳選拔賽，竟然意外失手，因為佢參加四百米賽事之時，一個唔小心，失去平衡，跌咗落泳池，俗稱「偷start」，以Thorpe嘅泳術，慢過其他人落水，都會贏番半個身位，使乜用茅招搶閘吖。但根據國際泳聯（FINA）嘅規條，「任何泳手在開始訊號發出前已開始，應予除名。」Thorpe就因為呢條條例，失去參加奧運四百米泳賽嘅資格。
澳洲全國為之儍咗，人人都為Thorpe不值，但公證人及澳洲泳總必須遵從規矩，別無選擇。喺其他地方，或有人為國家?天王巨星諗辦法，奧運金牌噃，係國家榮譽，點可以自動放棄？Thorpe嘅對手GrantHackett亦為Thorpe唔值，但可唔可以改例呢？將來就唔知，現在就算要改，都趕唔切啦。
成熟嘅國家唔會因為失去一個差不多必贏嘅金牌而違反規矩，成熟嘅國家級選手亦唔會因此而諸多抗議。世界觀眾或會因為失去喺奧運欣賞Thorpe嘅四百米泳術而失望，但大家應該瞭解，人人都要守法，覺得唔公道，就不妨諗辦法修改之，但未修改之前，大家仍要遵守。