富豪國際（078）早排炒上0.305元高位後，股價近日在0.27元橫行。經紀黃同小初講，佢覺得富豪最終會搞一次大型批股活動抽水。
經紀黃話，雖然股市反覆，但地產市道據講仍好掂，所以連炒味濃厚嘅富豪，最近亦獲得多家外資證券行垂青，頻頻邀約高層見面，早排已有百記為佢出報告，聽聞陸續有來。
正一好既唔靈醜既靈，經紀黃前日話亞洲鋁業（930）業績可能唔多好睇，結果噚日公布業績真係倒退，股價重一瀉如注，勁跌31%，險守1元收市，成交股數增至1.7億股，金額1.8億元。
睇嚟芬佬真係好唔滿意，雖然之前小初怪經紀黃唔一早通知，但睇番噚日股價表現，已唔算走得遲，如果等到噚日先走，就真係大件事。
另方面，經紀黃話蜆壳電器（081）業績靚及派息佳，果然畀佢估中，由虧轉盈賺8782萬元，兼有7仙股息派，偏偏股價倒跌2%，收2.40元。小初同經紀黃真係唔明，投資者咁都唔滿意，究竟要求啲乜嘢？
慕容小初