期指結算日大市勁彈，恒指收12641，大升214點，藍籌股初步已見底，反彈目標指向13000至13200。國企指數收4715，升142點，國期收4615，低水100點，主要係國企進入業績期，大部份在4月除息，以平均3厘息計，低水100點，仍算合理。
噚日踩中地雷。和黃（013）突然宣布分拆新興市場電訊業務上市，重包括持有早前獲注入和記環球電訊的中聯系統（757）的全部權益，如此安排，就一棍打殘中聯，令佢成為和黃電訊業務旗艦的憧憬完全幻滅，中聯股價噚日一早已裂口低開0.59元，大勢不妙，沽盤倒水而出，午後重一路插到落去0.425元（跌幅超過30%），先至定得住，臨近收市，幕後人終於出手，掃番上0.48元收，重排滿大軍，掛入34球。由於形勢突變，中聯暫時不宜沾手。
記得和黃高調宣布將和記環球電訊注入中聯，重成為中聯嘅大股東，令投資者覺得中聯將會成為和黃旗下電訊業務的旗艦，但短短個多月，和黃又急不及待，將電訊業務分拆上市，中聯更成為「二奶仔」，投資者的憧憬，原來只係一場「誤會」，而且係「慘痛的誤會」。
中聯小股東噚日嘅拋售，唔係恐慌性，而係絕望性，係對整件事作出「無言的控訴」。和黃的行動，令中聯市值在一日之內，輸掉9億元，但最重要、亦係無可彌補的，係輸掉了投資者的信心。
純睇圖表，中聯股價若能在0.45元之上營造底部後反彈，則RSI將出現3底背馳，將會係真真正正的見底回升。若「死了心」者，可當佢隱形；若想「報仇」者，仍有機會。
今日推介華潤電力（836），03年度（12月年結）業績，遠比預期為佳，全年獲利5.89億元，大增19.97倍，每股盈利20.4仙，旗下5座發電廠提供1545兆瓦權益裝機容量。
04年有多6間發電廠投入營運，05年又多一間，令權益裝機容量可上升至4438兆瓦，估計04年盈利10億元，05年16億元，每股盈利分別為0.26元及0.42元，以05年PE14倍計，股價1年目標價係5.9元。
郭兆誠