港股在期指結算日大幅反彈，升214點，收報12641，成交141.87億元。據聞里昂除咗每年一度發表趣怪傑作「風水指數」外，亦因應「秋官效應」進行研究，發覺秋官劇集播放至50至67%左右，大市就會見底回升，大結局之後半年都會升市，如果今次俾里昂講中，即係大市下個月就可以再展升浪。
華潤萬眾（331）宣布公開發售部份不足額認購，但值得留意是，今次全球招股總數有73.9%由7名獨立投資者認購，反映貨源相當歸邊。不過華潤萬眾業務前景一般，今次賣點在於高息，只能當公用股玩。
近日小小超揚言要將東燃（432）變身成為亞洲區豪宅發展商，此舉當然是為減持東燃造勢，不過東燃股價點吹都吹唔起，噚日逆市下挫6.9%至0.54元。注資交易完成後，電盈（008）將持東燃逾90%股權，肯定要減持，但想重演當年盈動的科技神話以天價批股，基本上冇可能，因為地產股實而不虛，即使樓市再好，股價都難以過份偏離現實，況且市場上可供選擇的地產股不少，加上現時市場游資縮減，在電盈減持的陰影下，相信東燃重有排跌。
中聯系統（757）就更加陰功，阿媽和黃（013）宣布另安排電訊資產分拆在港上市，令到中聯作為和黃在港電訊旗艦存疑，股價單日挫21%至0.48元。當日在每股0.90元接咗長和批貨嘅投資者真係好傷，已輸近五成。
阿虎