臨近季尾，啲球星都忙於應付球會啲賽事，其中有好多球星好似龍格保、林柏特同史高斯等重同自己國家斟掂數，唔打今晚嘅友賽。但係，阿仙奴嘅德國門將列文就不知幾咁重視今晚對比利時場友賽，點解？要爭上位囉！
爭緊三冠王嘅阿仙奴陣中國腳如雲，計落應有成十個喺今晚落場，但蘇甘保、A高爾、韋拉、皮利斯同龍格保，唔係傷咗就話要休息，今晚都唔會打；之但係，列文對今晚場友賽就不知幾咁期待，事關佢「揮贏」德國教練禾拉，畀佢喺今晚打正選；若然佢今晚有醒神演出，加上佢今屆咁弗，話唔埋喺歐洲國家盃決賽周，繼續坐正都未定。
好多人都認為，啲友賽真係無謂，只會加重球員嘅負擔，但對韋拉、蘇甘保同龍格保等就或者係；而對於列文呢啲大後備，友賽就係上位嘅黃金機會。
我求大俠噚日講過，切爾達季中搵番嚟救亡嘅教練安迪，見隊波搞極都冇乜起色，愈教愈心灰意冷；言猶在耳，呢位塞黑人果然就喺周一宣布走人！照睇切爾達今季真係冇得救，球隊無紀律、球員酗酒等問題好難搞，睇嚟重隨時成為首支於同一季踢歐冠盃兼降班嘅隊伍㖭。
因壓力大而同修咸頓提早分手嘅蘇格蘭籍領隊史特根，喺禮拜二俾英足總起訴，理由係佢喺上個月球隊輸畀阿仙奴○比二場聯賽，漠視球賽利益、為球賽帶來不名譽、同亂咁轟球證。講真，我求大俠覺得英足總好冇人情味，史特根俾修咸頓迫走已經咁慘，就無謂踩多一腳啦！
紐卡素嘅葡國新星維亞拿今屆冇乜上陣機會，但佢就有機會喺大銀幕亮相！因預計喺○五年上映、名為《GOAL!》嘅荷里活大片，會喺紐記聖占士公園球場取景，而維亞拿俾選中做主角戴高路拿（DiegoLuna）嘅替身。戴高路拿就係電影《衰仔失樂園》入面個靚仔主角囉！
早前有報道話皇馬嘅球星碧咸個大仔布魯克林加入咗英超熱刺嘅學徒訓練計劃，但最近又有報道話布魯克林跟咗皇馬嘅四至十四歲球隊操練，重話佢鬼咁勁㖭！另外，布魯克林最近養咗三條金魚，最過癮係佢將三條魚以碧咸嘅前隊友李奧費迪南、現隊友朗拿度同埋費高命名。