入行35年的森哥，14歲入行時由賣點心做起，他說：「當時有老表介紹（入行），開始時賣點心，賣咗3年」，之後森哥轉做「細路」，學做點心，「初初做細路無得整點心，只係洗衫打掃，做咗兩年先開始學整點心。」
森哥說，所謂學做點心，並非有師傅親自教授，只是一班「細路」在早上偷師，「師傅做點心時就收起嚿粉，到落場時用嚟練習。」
另外，當點心師傅「蛇王」，便會叫他們協助製作一些簡單的點心，如此這般練了兩年，森哥才開始正式學做點心。
入門第一款製作的點心是燒賣，原因無他，「因為易做」。包了數個月燒賣，便可升做「大細路」，開始進攻第二款點心──叉燒包。至於最高難度的蝦餃，一般可以製作此點心的師傅已算滿師，任何款式的點心都可以製作。
入行多年，森哥說最辛苦就是要早起床，「你諗吓，得幾度（氣溫）都要3點幾起身，𠵱家啲後生仔都唔願早起喇！」不過，他說這行早開工亦早放工，工作亦算自由。另外，由於少新人入行，所以即使近年多了一些新移民入行，亦「唔怕無嘢做」。