末日輪波動勁炒
一味窩輪：9162夠晒刺激

期指結算日，好友大報復，恒指彈升214點。藍籌Call輪升到七彩，不在話下。
龍虎榜排頭位嘅係恒生Call輪9162，由5.6仙飛上15仙，升幅159%。正股（011）收101元，升幅2.8%。9162已屆末日之期，4月中屆滿，溢價0.5%，槓桿率67倍。隻輪行使價100元，𠵱家啱啱價內，未來幾日仍會飛沙走石，充滿賭味，正股一蚊幾毫上落，閒過立秋，但隻輪則隨時上落幾十個巴仙。賭呢隻輪，食得鹹魚抵得渴，要有心理準備可以贏好多亦可以輸好多。賭恒生Call輪想賭得個心臟冇跳得咁勁嘅，可以揀隻9782，9月到期，輪價55仙，溢價4.5%，槓桿率18.4倍。

博恒地跑快啲買9440
電盈（008）收5.20元，升20仙。5元大關暫時證明守得好穩，估計會因超賣而繼續爬番高啲，可以吼少少Call輪短炒，但標準輪件件溢價高到飛起，難以落手，可以跟勢搞隻鎖定回報輪9762，呢件成交旺，按發行商網頁資料，溢價8.3%，有效槓桿率5.3倍，上車後有得執，見利即收。
恒地（012）係地產股中昨日升得較慢嘅一隻，博跑番快啲，執些少Call輪博吓，正路對象係9215，輪價35.5仙，溢價1.1%，槓桿率10.7倍，留意5月中到期，炒嘢要快手快腳。唔想有時間壓力，則揀9440，7月到期，溢價7.5%，槓桿率9.9倍。
章盛