人大釋法來勢洶洶，曾麟詩三人組成嘅「政制發展諮詢小組」，一早經已架空，立法會話要傳召阿董嚟解畫。解畫又有乜用？現時成個特區政府，講到政制發展呢一層，中央人民政府，左一句「啟動權在中央」，右一句「解釋權在人大」，全廢武功。
現時特區根本係個爛局，連好多親中愛國分子都唔知中央人民政府想搞邊科。想保董？梗唔係。想保住九月立法會半數議席？民建聯轉軚個樣咁核突，中方愈強硬，民建聯愈叫苦，點樣保？想嚇窒香港人唔好投票畀民主派？投票係不記名，呢樣就更天真。中央人民政府咁樣大石砸死蟹，若果只係想強奪三兩個功能團體議席，確保立法會唔「淪陷」，將中國政府簽署過的《中英聯合聲明》等協議嘅誠信（若然重有任何剩落），將胡溫「以民為本，執政為民」嘅面子，一鋪過重鎚押晒落去，賺同蝕，制唔制得過，儍嘅都計算得出。
不過現時係非常時期，完全冇常理好講。釣魚台呢鋪，放任「民間保釣」組織挑釁完一回合，跟住又唔准保釣船再出海，究竟想搞邊科，連㗎仔都𢱑爆頭。外交界流傳，因為中央人民政府最近放咗支火箭，楊利偉做完英雄，日本見到，對中國經已躋身發達富裕國家行列，感到十分欽佩，為免阻住中國人民自求多福及顧全其自尊心，日本好心提出削減經援貸款，以免俾全世界誤會，以為中國向日本乞食，並且言出必行，最新呢一期經援，即時減款兩成。點知一番好意，遭到對方曲解，估唔到因為咁，有人就刺激到發啷厲，即時反枱，為顯顏色，就揀咗釣魚台做一個發洩位嘞。
現時嘅形勢，所以係十分尖銳複雜。台灣總統大選又俾阿扁冧莊，中央人民政府就梗係希望幻滅，惱羞成怒。蔣彥永醫生話要平反六四，結果就連孤兒寡婦都唔放過，六四期間遭受解放軍開槍格斃嘅學生蔣捷連嘅母親、喺國際上以「天安門母親」著稱嘅丁子霖女士都遭到生擒拘禁。上頭𠵱家邊個揸緊莊？各國駐港領事都好想知，寫報告畀本國政府。不過，開講有話：怒從心上起，惡向膽邊生，香港人若然重想○七普選，就要自己諗吓，有冇人哋台灣人咁硬淨，堅持自己信念，將示威遊行，當做係呼吸空氣咁正常，定係當謊言重複一千次就當咗係真理咁聽，以為民主就會動亂，都係做順民好啲，又或真係將媽田及卿姐當係所謂嘅「漢奸」，呢啲大是大非，就真係要自己決定囉。
唔怕，距離○七，重有三年，離九月立法會選舉，則係半年唔到，點樣堅持港人治港、高度自治，大家有足夠時間深思熟慮，到時手上嗰票，千祈唔好投畀一啲貌似人形、其實就係豬狗不如嘅政治投機動物囉。
傳真︰2623-9278
電郵︰