最後一日石澗巡禮，今日離開新界，去離島，帶大家暢遊「2004年香港最美麗河溪選舉暨河溪攝影比賽」候選石澗之一嘅大嶼山凌風石澗，石澗水流稍弱，但中段嘅翠月潭勁富詩情畫意，一樣有拍攝靚位。
記者：陳震霖
攝影：梁細權（部份相片由香港郊野活動聯會MahlerKa提供）
模特兒：Ricky（StarAsia）
1連環小瀑
翠月潭潭頂有連環小瀑，級級落，勁有層次感，凌風石澗必影靚位。
2平靜潭面
潭如其名，一片翠綠，形如一鉤彎月，微弱流水泛着漣漪，另一必影靚位。
3潭頂
登潭頂不難，踏足其上，背景山巒綠草，前景亂石四布，中央一片碧綠，構圖亦好。
大澳道靈隱寺落車，見「大嶼山郊野公園」指示路標，附近有小路入澗，路口好隱蔽，認住所在有個消防喉，唔好行錯路。行10分鐘，開始聽到潺潺流水聲，抬頭一望，見右手面大石壁好整齊咁刻咗副對聯，可惜顏色脫落，10隻刻字模糊，旁另有4字寫「佛語心中」，估計係句佛偈，嶼西有靈隱寺、西來意苑、觀音廟、龍岩寺等等佛道寺廟，石壁出現佛偈一啲唔出奇。過石刻繼續行，好快就行到凌風石澗澗尾。
澗尾流水已經非常清澈，連水底有幾多塊石頭睇得一清二楚，望着自己喺水裏面嘅倒影，Ricky二話不說，用清水洗面醒醒神，感覺係：「涼浸浸，好爽！」
爽還爽，不過涉澗都要注意安全，點解咁講呢？涉澗同普通行山遠足係兩回事，第一，澗石非常濕滑，好容易差錯腳拗柴，第二，涉澗根本無明顯嘅「澗路」，有時要攀石，有時要穿越雜草叢林，步步為營唔在講，重要捉緊旁邊樹木而行，記住捉緊較實淨嘅樹根部份，唔好靠脆弱樹枝借力。出發前自備行山杖，行頭嘅負責開路，帶定鉗清除雜草，咁樣就大大減低涉澗嘅危險性。
𠵱家重係旱季，石澗流水主要係霧水，水流唔多。逆流而上，起初個半小時路程，大家會經過2個水潭，每個水潭之後都有小石壩，防止雨季山洪暴發。過小石壩，再攀10分鐘，就嚟到凌風石澗最美麗嘅一段──翠月潭。
可能因為湖水清澈，夠翠綠，加上水潭外形又似一輪彎月，所以就俾本地旅遊界稱為翠月潭，潭面積唔算大，但潭上小瀑布極富層次感，流水緩緩逐級而落，氣勢唔算磅礡，但春霧圍鎖，空氣瀰漫泥土氣息，好一幅意境盎然的春郊山水畫。此時此刻，大家唔好吝嗇，拎起相機就拍啦。
睇完凌風石澗，唔好咁快走住，攀過左手面刺激萬分嘅20米高碎石坡，就會到達引水道，再經路標指示前往龍仔悟園。𠵱家係初春，暢遊悟園係時候，園內山茶盛放，加埋曲折多姿嘅九曲橋、古色古香嘅湖心亭，全部都係如詩如畫嘅美景，影埋相至落山，保證唔會嘥菲林。影完靚相，經山路下落大澳，旅程正式結束。
交通
去程：東涌市中心乘11號巴士（$11.9）入大澳，大澳道靈隱寺站下車，抄小路入澗。
回程：大澳乘11號巴士，返回東涌市中心。
拍攝小貼士
1.翠月潭連環小瀑由上而下，建議採用「直度」構圖加低處仰攝，可以加強流水逐級落嘅順流效果。
2.白天拍攝，兼翠月潭無遮無掩，用ISO1000感光度菲林即可。
3.必備超廣角鏡，以備退路不足都可以嚟個全景拍攝。
4.想瀑布睇落洶湧澎湃，快門速度宜調校至1/500至1/1000秒；若用1至3秒慢快門，剛強流水就會顯得輕柔飄逸，好似一片輕紗。
其他候選石澗
香港九大石澗之一，土名「企屻坑」，位於大東山雙東坳，流入東涌海，景點有上書「臥龍長嘯」嘅四字大石、40呎高黃龍主瀑、水清冰涼嘅黃龍潭。
交通：東涌地鐵站A出口出順東路，經消防局上天橋直往赤鱲角村，再經小路入堤壩直達。
位於大嶼山靈會山峽谷之下，流入二澳灣，鄰近萬丈布，沿澗直落，可觀賞鼻涕瀑、萬丈飛流等奇景。全程山路曲折，下望萬丈深崖，只適合有豐富遠足經驗者行走。
交通：東涌乘11號巴士（$11.9）入大澳，沿牙鷹角入二澳村，跟指示向左入叢林即見石澗。
2004年香港最美麗河溪選舉
暨河溪攝影比賽
投票日期：2004年5月至8月
投票方法：登入
攝影比賽：以全港400多條溪流為題材，網上有資料提供遞交作品的截止日期及方法。
查詢電話：27392481