恒基地產大埔豪宅新盤比華利山別墅，前面嗰間「殯儀」村屋，近排又有動靜。外牆近兩個月開始搭晒棚。
蘭西去現場睇過，見到成間屋畀一枝枝3層樓咁高嘅黃色木條包圍住，剩係留番幾個窗口同門口。
望落都幾古怪，不過，驚嚇度點唔及年幾前，屋頂擺放棺材，門口放滿紙紮公仔，外牆掛咗布條咁得人驚。
間屋02年8月租出，租客將間屋布置成殯儀館咁款，搞到附近居民極度恐慌，最慘就係恒基，隔籬啱啱起好豪宅別墅，畀佢搞到開售無期，最後重要對簿公堂。
件事擾攘咗年幾，到舊年底先至庭外和解，法院頒發禁制令，禁止租客喺村屋繼續擺放殯儀物品，同做相關業務。
不過，區內代理話，恒基今次因禍得福，上年樓市係過去十年最差嘅一年，豪宅就算低開，都未必賣得好。
今年個市升番去95、96年水平，開價進取啲，都唔怕無承接。
近大半年，代理行收入個個月創新高，美聯因而決定回饋社會，成立「美聯善慈基金」，由前顧問黃錦康做榮譽會長。
黃錦康話，美聯會喺二手成交佣金中，撥出零點一個巴仙，畀善慈基金，若以舊年五億幾佣計，基金就有五十零萬。
佢話，基金主要目的係，教育市民認識樓房長遠價值，即係等於投資基本法，等啲人唔好以為實升，要量力而為，咁就唔會再出現97年嘅泡沫，同後尾出現嘅負資產。另一個目的，係做善慈捐獻，如捐畀教會建校同搞活動。
講開慈善，利嘉閣噚晚搞雀王大賽，所有入場收費捐比奧比斯作為慈善用途。聽講，有成一百六十多個員工參加，淨係入場費收到七萬八千蚊。
樓市成交速度加快，買家追唔切，只好揼心口，再有啱嘅就拿拿臨。
金豐鴻運董事關仲年話，移民美國回流客，諗住喺香港發展，四出睇樓，主要睇港島。
原本睇啱中半山慧景臺，貪實用率高，有九成，點知好快畀另一個買家高價搶咗去。
最近，又有一個中層四室放售，八六二方呎，呢個回流客一聽到就趕去睇，隨即用三百六萬買咗，以免夜長夢多。據聞，佢係用同業拆息嚟定供款息率。
蘭西
電郵地址：