在妻子阿蘭眼中事事做足一百分的李冠英，日前在地盤工作期間慘被高空墮下磚頭擊中頭部，傷重身亡，一個幸福家庭就此破碎。今後要獨力照顧年幼女兒的遺孀阿蘭坦言：「眼前嘅嘢都未應付到，何況將來呢？」蘋果日報慈善基金撥款一萬五千元，助阿蘭應付急需。
遺孀阿蘭在家中接受記者訪問時，情緒十分波動，時而冷靜如常、時而激動嚎哭。
「如果唔係為咗個女，我早就跟埋阿冠去。呢幾日我淨係識得喊，我都驚自己會黐線，總之就覺得好痛苦。」三十歲的阿蘭說。
阿蘭與丈夫李冠英九六年結婚，婚後誕下女兒欣欣，現年四歲，就讀幼稚園低班。
阿蘭表示，丈夫任職地盤多年，由「散仔」做起，多年來憑着良好工作表現及不斷進修與地盤工作有關的課程，慢慢晉升至管工，工作勤奮盡責。阿蘭坦言，她一直擔心阿冠工作危險，他年前亦曾於工作期間弄傷頭部，惟搵食艱難，她只好叮囑丈夫開工時注意安全。
然而，意外終究防不勝防。本月十九日，李冠英在荃灣四坡坊一個建築地盤工作期間，疑遭從籠𨋢意外掉下的磚頭擊中頭部，把其安全帽擊至破裂，阿冠當場頭破血流，重傷昏迷，送往醫院搶救後終告不治。
阿蘭嚎哭着說：「事發嗰日，係我姑媽通知我阿冠出咗事。我趕到醫院見醫生，佢叫我冷靜啲，佢話阿冠已經唔喺度，當時我真係接受唔到呢個事實。阿冠一句說話都冇留低，佢有乜心願未了我都唔知……」
其在旁的四歲女兒欣欣，眼見母親痛哭，緊緊捉着母親雙手，一臉惶恐地說：「媽咪唔好喊、唔好喊啦！」
阿蘭待心情稍稍平復後說：「我同阿冠拍拖三年先結婚，佢份人好到不得了，唔食煙唔飲酒，每日放咗工準時返屋企，放假就帶我同個女出街玩。我哋結咗婚八年都未嗌過一次交，阿冠又錫個女錫到燶，𠵱家個女成日搵佢爸爸，經常問：『爸爸幾時返嚟食飯？』」
丈夫猝逝，阿蘭不僅精神大受打擊，實際生活問題亦接踵而來，刻下，她連亡夫的一筆殮葬費也無力負擔，遑論日後挑起養育女兒的重擔。
蘋果日報慈善基金有見阿蘭境況堪憐，即時從「殮葬專戶」撥款一萬五千元，助阿蘭辦理亡夫身後事，解眼前燃眉之急。
捐款編號：C1328
暖流熱線
電話：29908688
傳真：23702192
電郵：
網址：
