呢排有好多fans為咗要引起偶像注意，佢哋會打電話去報館報料，聲言會對某某歌星不利。好似早排有個關心妍嘅癡情fans，就事先張揚話要綁架佢，搞到關心妍出發去美國學唱歌都要搵人保護。噚日又有fans打嚟報館，話要對楊千嬅不利，又係要綁架佢咁話。
打嚟報料嘅人，聲稱有個朋友係陳慧琳（Kelly）歌迷，覺得偶像個勢俾千嬅蓋過晒，所以要為偶像做啲嘢，不過打嚟報料嘅人，講嘢就有啲語無倫次。
馮仁昭噚日同千嬅經理人黃柏高（Paco）通過電話，佢知道呢件事之後都好緊張，佢重話無論打電話嚟嘅人係乜嘢動機都好，為防萬一，公司呢輪都會加強對千嬅嘅保安工作，如果有需要的話，重會考慮報警備案。睇嚟Paco都幾緊張千嬅安全。
樋口明日嘉早排幫一隻豐胸丸做代言人，佢就話自己試咗豐胸丸之後，就由32A搖身一變升cup到33C咁話喎。所以佢就梗係勁着bratop騷身材做宣傳啦，佢日前拍廣告時谷胸又踩單車又玩貓，無非都係想話畀人知，佢正到乜嘢動物都可以吸引到啦！
EMI唱片最近為咗縮皮，決定取消中文部，香港歌星出碟會全部交番畀黃柏高嘅金牌唱片負責，不過有報道話何韻詩同Shine因為唔係搵金牌做經理人，所以金牌會放棄佢兩個，噚日馮仁昭打過畀Shine嘅經理人錢小慧，佢話冇人通知話唔同Shine出唱片，佢相信EMI嘅變動對Shine唔會有太大影響。
薛家燕前晚喺尖沙嘴筵開八十三席，同家人、圈中好友以及戲迷等慶祝佢嘅五十四歲生日。家燕姐噚日重帶病返去將軍澳電視廣播城拍攝《皆大歡喜》，有記者就問佢有關入稟法院告樓上住客嘅事，佢就話：「冇件咁嘅事，會唔會係我堂妹呀，佢個名嘅英文譯音同我一模一樣。」
成龍日前話台灣選舉係天大嘅笑話，呢番說話引起台灣方面好大嘅反感，有網友話叫佢「滾回香港」，有網友話成龍之前因為「小龍女」事件，話自己「犯了全天下男人都會犯的錯」，搞笑程度唔輸畀台灣選舉，台灣藝人蔡振南噚日重話，唔信成龍講完呢啲嘢，重有台灣人會支持佢，今次成龍真係衰多口。
早前有報道話應采兒同做貿易生意嘅有錢仔William拍拖，重話佢哋已經去到同居階段。應采兒噚日透過經理人李小姐話自己同William係朋友，識咗兩三年，當晚只係幾個朋友一齊去飲嘢，見到有記者，所以佢走先，至於話同居，就更加冇可能，因為應采兒𠵱家係自己一個人住。
