美股前晚造好，港股噚日勁升逾二百點，係秋官（圖）新劇《血薦軒轅》本月八日登場以來最大升幅。講開秋官效應，八方噚日收到一份由里昂證券撰寫分析秋官效應嘅報告，報告有六頁，兼且圖文並茂。
報告重列咗個表，顯示秋官係九二年《大時代》開始到𠵱家，九套電視劇上演期間，港股全部下跌，有啲重跌餐死，跌幅由百分之零點一至兩成四不等。不過，里昂最有趣嘅發現係當秋官套戲做咗一半至到三分之二嘅時候，個市就會開始見底反彈。
今次《血薦軒轅》一共有三十七集，做到四月二十四日（星期六一連播兩集大結局），照咁估，個市係呢個禮拜至下個禮拜（四月一日至七日）就係見底之時。唔知係咪真係有人信，個市噚日又真係回升，真係咁啱？
里昂重話，根據佢哋統計過秋官九套戲係見底之後三個月，股市通常都回升。所以呢兩個禮拜可能係一次掃貨嘅機會。里昂估計港股將見一萬三千五百五十點。不過，里昂都補充話因為只有九次紀錄，誤差可能好大。
傳真︰2623-9278
電郵︰