直資名校聖保羅男女中學每年學費高達六萬蚊，畀人稱為「貴族直資」，不過該校候任校長陳黃麗娟噚日就同八方呼冤，話聖保羅絕對唔係貴族學校；佢話𠵱家啲細路同以前唔同，生活環境太富裕，搞到EQ比較差，所以佢計劃今年九月上任後，安排學生去體驗窮困人士嘅生活。
陳太𠵱家係津貼中學議會主席，喺大埔聖公會莫壽增會督中學做校長，佢話今次肯接受聖保羅挖角，係想轉下環境，相信喺直資學校可以有另一番作為，過去曾批評教改嘅佢，噚日強調絕對唔係因為對教育制度失望而轉投自主度較高嘅直資學校。
陳太同聖保羅現任校長潘鎮球好有緣，原來潘校長九三年離開莫壽增移民去加拿大，陳太就接咗佢校長之位；潘校長九七年回流後，五年前做聖保羅校長，估唔到佢呢次退休，接佢位嘅又係陳太喎。
（圖）陳黃麗娟（右）同現任聖保羅校長潘鎮球（左）好有緣，因為呢次係陳太第二次接任潘校長之位。中間為聖保羅校監麥海雄。
傳真︰2623-9278
電郵︰