有個天后級歌手唔單止孤寒，佢重幾重階級觀念，所以同佢合作過嘅人都對佢印象麻麻，所以佢冇乜朋友。
話說有日天后歌手出街做完嘢，因為有啲肚餓，所以就叫個司機車咗佢去一間餐廳食飯，原本佢都想搵個朋友同佢食飯，但佢得嗰兩、三個朋友，梗係搵唔到朋友臨時臨急出嚟陪佢啦，結果佢就叫咗喺門口等佢嘅助手入去陪佢。
佢個助手入咗餐廳後就同天后講，話司機大佬今日車咗佢哋成日都未食過嘢，不如叫埋司機大佬一齊入嚟食啦！點不知天后反應好大咁話：「呢啲低等人，邊有資格同我一齊食飯！」
其實個司機大佬同佢都合作咗好多年，都好錫天后，如果俾個司機大佬知天后咁講嘢，肯定傷心死佢。
台灣歌手蔡依林噚日為南投花卉嘉年華做宣傳，大會委任佢做「花卉大使」，佢打扮成一位綠色嘅花仙子咁，問到蔡依林鍾意收乜嘢花？佢用國語話：「沒有特別，只要搭配得宜就好。」蔡依林嘅外婆同親戚都住喺南投，佢對呢個地方好有感情，佢又話：「我很喜歡惹味的竹筒飯，懷念小時後跟表哥跑到地藏王母廟拜神。」
負責劉德華唱片製作工序嘅加際娛樂有限公司，被劉德華嘅公司濠佳有限公司申請清盤一案，劉德華嘅代表噚日喺高等法院透露，另有一間多藝媒體有限公司支持今次清盤申請，代表加際嘅律師喺庭外表示，相信該公司亦係劉德華嘅公司，由於加際申請呈交更多嘅誓章，故案件押後至五月三十一日先再聆訊。
案件編號：HCCW81/2004
鄭秀文（Sammi、左）同新人薛海琪（Fiona）前排幫港台錄咗一個廣播劇《龍鳳情長》，由於Sammi一直以嚟都好鍾意錄廣播劇，佢最想就係演繹一啲特別人物嘅聲音。而Fiona知道要同Sammi合作就表現得好緊張，錄音時都頻頻NG，好彩最後得到Sammi指教先可以順利完成。
韓國性感天后李孝利喺亞洲就好多人識，但去到澳洲就唔敢咁講。早排佢同男星權相祐去澳洲拍攝手機廣告，竟然俾澳洲機場嘅警方扣留咗成個鐘，原因係李孝利當時手上一件行李都冇，警方懷疑佢係非法逗留人士，嚇到李孝利面無血色。查實通常啲日韓大明星閒閒地有幾十人跟住，邊有可能自己攞行李先得㗎？
王力宏噚日喺台灣出席電單車宣傳，佢喺後台接受訪問時用國語爆料話：「我沒駕駛執照，所以得找時間去考試。」他表示近日喜事重重，搞到大家誤會佢宣布同張惠妹嘅喜訊，點知佢話：「其實是我下個月發第一張日文專輯，我又會回美國錄新專輯以及籌備世界巡迴演唱會等。」
由澳洲影星米路吉遜（MelGibson）執導嘅電影《受難曲》後日正式喺香港上映，不過呢套戲仍逃唔過電檢署嘅尺度，被列為嚴禁十八歲以下人士入場嘅三級電影。《受難曲》係講述耶穌基督釘十字架前十二個鐘頭為世人受嘅苦難，當中不乏血腥場面，美國及巴西先後有觀眾睇到受驚過度而身亡。
