中大鬧出國際醜聞！事緣中大早前公布噚日會喺校內搞個「全球大學校長論壇」，本港八大校長、中國同英美澳好多大學校長都有出席。中大班學生仔同員工代表竟然集體告洋狀，以馬拉松式示威抗議中大「肥上瘦下」。
點知校方擺出空城計，臨時更改開會地點去咗沙田馬會，挫敗學生同請願人士獻媚外國勢力嘅圖謀。但唔知係咪急得滯，通知唔切與會嘉賓，卒之有兩名與會者撲空，幾咁狼狽；而為保「神秘」，開個咁大型嘅學術會議，連記者都唔招呼，除咗自己友，無人知講過乜同開嚟做乜。
中大口口聲聲要做世界級大學，但作風愈來愈似祖國政府官員，校方、校長面對學生嘅請願行動閃閃縮縮，都幾貽笑大方。
（圖）班校長雞飛狗走，校方就搵咗大學人事處副處長阮先生（左）接收中大員工總會嘅抗議聲明。
王子俊攝
傳真︰2623-9278
電郵︰